Carnevâl
La joibe grasse dal 1511:
si trate di un riviel (rivolta) che si è verificât intal carnevâl dal 1511 in Friûl.
Protagoniscj:
Strumîrs = la plui part dai nobii de Patrie dal Friûl cun leams cu la Austrie. A controlin il Parlament de Patrie. A son des fameis Della Torre, Colloredo, Strassoldo.
Çambarlans = nobii sot de direzion de famee dai Savorgnans, a àn il comant des Cernidis (lis miliziis contadinis). Si poin a Vignesie. A concedevin dirits ai contadins.
Çambarlans
Strumîrs
Situazion gjenerâl in Friûl:
- Ta lis tieris dal Friûl al è in at un conflit tra Vignesie e l’Imperi, cui soldâts e i mercenaris dai doi stâts che a corin indenant e indaûr pal Friûl, copant, brusant e
robant. Si trate di une vuere là che il Friûl al è la vitime principâl
- Fazions di nobii si scuintrin in faidis sanganosis.
- I contadins a son esasperâts par vie de miserie e di ce che a scugnin subî dai nobii che a pretindin ancje di controlâ lis comugnis (terens doprâts di dute la comunitât). I contadins a scomencin a ribelâsi in tancj paîs dal Friûl.
Intal nestri teritori
Tal Març dal 1510 un trop di nobii al rive a scjampâ par un pêl a un grup di contadins dongje Çupicje.
I fats:
Ai 27 di Fevrâr dal 1511 e je Joibe Grasse e la citât di Udin e je plene di int rivade ancje des vilis dulintor.
Al scopie un scuintri tra i partidants des dôs fazions nobiliârs: i Strumîrs e i Çambarlans. Alore i popolans di Udin e i contadins rivâts dai paîs dongje de citât, judâts des cernidis, a assaltin i palaçs de nobiltât, a cjapin i nobii e ju copin.
Par cuietâ il riviel udinês al à di rivâ un trop di cavalarie de place fuarte di Gardiscje, ma, intant, il partît strumîr al à za pierdût diviers dai siei oms di ponte.
Il riviel si slargje
Di Udin lis flamis de rivolte si slargjin intal rest dal Friûl. Organizâts in bandis di vuerilie, i contadins a cjapin, a metin a sac e a brusin i cjistiei di Breçà, Cergneu, Cjaurià, Colorêt, Cusan, Çopule, Darcjan, Feagne, Madrîs, Murùs, Porpêt, Prampar, Salvarûl, Sant Denêl, Spilimberc, Susans, Tarcint, Var, Vilalte e Voleson, ma ancje i palaçs dai nobii a Glemone, Tresesin, Tumieç e Vençon.
Denant di un riviel che al è fûr di ogni control, i nobii furlans e lis autoritâts venezianis si dan dongje e a inviin la repression.
Daspò dal riviel
La gjandusse (peste) e il taramot che a scjassin il Friûl subit daspò a dan il colp finâl al riviel.
Informazions gjavadis di:
http://www.ondefurlane.eu/la-joibe-grasse-dal-1511/
1511 il Friûl de joibe grasse di Luigino Peressini e Carli Pup
http://www.dovatu.it/news/la-rivolta-della-joibe-grasse-zobia-grassa-1511-955/
Pieri
e il riviel dal 1511
O sin intal 1511
e Pieri al à 12 agns .
Al è carnevâl.
Doman e je joibe grasse.
Pieri nol è plui un frut.
Nol è mai lât a scuele.
Dome i nobii e i predis
a son istruîts.
Al è bielzâ di tancj agns che al lavore cul pari
intai cjamps e inte stale.
Al scolte i discors dai grancj...
“No si puès plui lâ indenant cussì!”
“No! Chi nô o murìn di fam!”
“Tai cjamps a son passâts sù e jù!"
"E austriacs e venezians!"
"E venezians e austriacs!”
“Nol è restât plui nuie!”
"àn masanât sù dut!"
“E i nobii a continuin a domandâ e a comandâ”
"E a freânus lis comugnis!!!"
“Vonde!”
“Vonde!”
“E je ore di finîle!”
“Doman a Udin!"
"Ur a le fasìn paiâ!”
Udin...
Al è di partî cul cjar tirât dal mus.
Dite, fate!
Pieri al sa che no lu lassaressin mai partî e cussì a buinore
(al è ancjemò scûr)
si tapone tal cjar tal mieç di forcjis e falcets,
di palis e curtissats (di chei che si dopre par purcitâ).
"Marie, dîs ae mame di no stâ in pensîr!"
"Però tu sta atent!"
"Di sigûr! Mandi, Marie! Torne tal jet prime che ti viodin!"
La sûr e je preocupade, ma e tâs parcè che si sint il pas dal pari.
Nol è facil par Pieri fâ dôs oris di strade taponât li daûr,
scjassât di ca e di là dal cjar che al salte tes busis e tai claps.
Fortune che al è tal mieç de paie che lu tapone dal frêt crût.
Fûr de citât di Udin,
Pieri al cuche di sot de paie.
E je une milizie di contadins pronte par jentrâ inte citât.
Un om al dîs a un siôr sul cjaval:
“La cernide e je pronte, sar Savorgnan!”
“Benon! Vie, alore!”
e dopo, zigant: “Anin, anin a faiale viodi ai Strumîrs!”
Pieri al pense: “I Strumîrs? Ah, sì! A son i nobii al servizi de Austrie!”
Al sin ancjemò: “Anin, Çambarlans!”
Pieri al capìs subit che chel lì al è Toni Savorgnan.
Al è capo dai Çambarlans: grup di nobii cun Vignesie e che a fasin cualchi concession dai contadins.
Il mus al tire il cjar daur dai Çambarlans.
Di corse a jentrin in citât!
I disordins a son scomençats.
Pieri al dismonte di corse, ma so pari lu viôt, lu cjape par un braç, lu strenç cun fuarce fin a fâi mâl:
“Ce fâstu chi? Vustu fati copâ?”
“O soi chi a judâti, pai!”
“Alore ten il mus e jentre dentri inta chê stale li e no sta moviti!”
“Parcè pai?”
“Viôt dal mus!”
al busine il pai
sparint tal mieç
di un trop di oms cu lis forcjis in man che a jentrin corint intal palaç di un nobil Strumîr.
Si sint zigâ:
“Cor, cor!”
“Cjapilu, cjapilu!”
“Copilu!”
Pieri, nol à plui frêt! Al à tai voi oms strissinâts, il sanc che al cor pe strade e lis flamis dal fûc che a brusin i palaçs...
Clostri faliscje lisiarte fouc
lame criviel rusin sesule clap.
(My Sarajevo- Mitili FLK)
A Pieri i ven un atac di nausie e al bute fûr la aghe che al à tal stomi vueit.
I zire il cjâf e al capìs che al jere miôr se al stave cjase.
Ma cumò lis vôs a son di vitorie:
“Vive il carnevâl!”
“Fieste, fieste!”
Il pari di Pieri al torne cuntun biel toc di pan:
“Cjò, mangje Pieri!”
Lis vôs di fieste no durin trop.
Il riviel al va indenant ancjemò:
Al durarà par altris trê dîs.
Il pari di Pieri al decît che al è masse pericolôs par restâ ancjemò li
e cussì a tornin a cjase.
Pe strade a cjatin int che a ven di altris paîs.
I contadins a scombatin cuintri ducj i siors pardut aromai.
A cjase la mame e je contente di viodiju rivâ e a suie svelte une lagrime.
I dîs a passin e Pieri al scolte lis gnovis:
"E je rivade Vignesie a fermâ il riviel!"
"Cuissà ce che al sarà di nô, cumò!"
"O vin pierdût!"
A son avilîts Pieri e so pari, ma no san che il piês
al à ancjemò di rivâ!
Il grant riviel dal 1511 al finìs pe repression di Vignesie
ma soredut pa
la gjandusse (peste) e il taramot (ai 26 di Març dal 1511)
che a copin
tancj altris
contadins e citadins e nobii
cence cjalâ in muse nissun!
Dissens copiâts dai fruts di cuinte dal test:
Riviei di ingjustri - lis contis a fumuts dal premi Friûl dal 2010 - Informazione friulana/Associazion 1511.
Dissens libars: fruts di classe 5 e di prime. Ogni imagjin e je salvade cul non dal frut che le à fate.
Test: mestre Lorele
Altris imagjinis linkadis al sît di origjin.
1511, 27 DI FEVRÂR
dal grup "Ad Plenitatem Lunae"
Cjale là al è il Savorgnan si fâs vant di sei cun nô
ma al tabaie dal barcon da ch’a no si spete dam
Strumirs o Çambarlans
al è bon dome il lôr sanc
pa la strade, ducj compagns,
a mi plasin nobii e siôrs
s’à son viarts dal flanc al flanc,
i cadavars lassiju li
e àn di disfamâ i cjans!
Rit:
Un colp, doi colps,
trê colps,
cuatri colps, dîs colps
cinc colps, sîs colps,
siet colps, cent colps
il clap si fâs rubin.
I libari a ogni colp,
la mê fam, il gno murbin,
I libari a ogni colp
la tristerie
di un sassin,
al vai ancjemò il signôr,
tant che violentât
ch’à si gjoldi lui, cumò
il sintissi disperât!
Come gran par il falcet, come len sot dal massanc
a Carneval, chest an, al è un diaul in ogni pet!
Siôr al è inutil se i vaîs come nô atôr de taule
come chei dai tiei paîs,
ma cumò s’a ti console al è cualchidun ch’al rît,
i soi jo, soi chel che al cjante
e ti strissine par i pîts.
Ven chi, ven disgrassiât, che viodin trop che tu cumandis
da sot il curtis.. ce? No tu staras migo vaint, no? Maladet, tâs almanco, cumò che coventares che tu ti cumpuartassis come un siôr.. Neancje un fregul di dignitât no tu âs.. Ma ce che tu ti
lamentis? Tu âs il braç rot.. e alore? Tant no tu lu âs mai doprât se no par da ju cul racli.. e poi tant cumò no ti coventarà plui.. cjale, cjale Udin par l’ultime volte, cjalile intant che ti
tai la gole.. fetent.
Cjolt chi: https://m.facebook.com/notes/ad-plenitatem-lunae/1511-27-di-fevr%C3%A2r/146969015355775/
Lis peraulis metudis dentri tal test a son inte cjançon dai Mitili FLK
Clostri faliscje lisiarte fouc
lame criviel rusin sesule clap.
Ogni vuere e puarte muarts e sanc,
Ancje cumò come une volte...
Ancje une volte come comò...